Gihimakak sa fire marshal sa dakbayan sa Talisay Felipe Canillas ang taho nga adunay mga minor de edad nga giingong nagbaligya sa ilang dungog ang mosulod diha sa fire station sa Barangay Poblacion ug manghagad sa mga bombero.
Si Canillas sa pakighinabi niini sa Banat News kagahapon nagkanayon nga nakugang siya sa maong taho ug wala siyay kasayoran niini.
Kahinumduman nga adunay mga minor de edad ang giingong mag-estambay diha sa Barangay Poblacion nga nagbaligya sa ilang dungog ug manghagad sa mga masuroy sa lugar.
Apan adunay mga taho nga ang uban sa mga minor de edad ang giingong mosulod diha sa fire station ug manghagad sa mga bombero.
Matud ni Canillas nga ang maong taho nabasahan na lang niya sa pamantalaan ug gani gisukit-sukit dayon niya ang mga nadestino diha sa fire station sa Poblacion apan negatibo ang resulta sa mao niyang pagsukit-sukit.Gibutyag sa fire marshal nga ang hepe sa nahisgutang sub-station nga si SFO4 Jose Suico ang ilang gitahasan nga moimbestigar sa maong taho.
Si Canillas midungag nga iyang nahibaw-an nga dunay mga minor de edad nga mga babaye ang moanha sa lugar apan anha man kini mag-estambay sa mga burger stand ug mangaon.