Duha ka mga lalaki ang gisikop sa mga sakop sa Waterfront Police Station human nila suwayi og suborno ang mga polis nga misikop sa ilang kauban diha mismo sa buhatan sa maong mga polis niadtong milabay’ng kaadlawon.
Ang naaresto giilang sila si Paul Delfin,33, residente sa dalan Labucay sa barangay Mabolo ning dakbayan ug silingan niining si Joel Ripdos,36. Ang duha giposasan dayon sa grupo ni SPO1 Daryl Alalin sa miscellaneous team sa maong police station.
Matud pang Alalin sa pakighinabi sa Banat News nga tuyo sa duha nga luwason ang ilang mga higalang sila si Juan Magallano,31, ug Dennis Rosillas,30, kinsa nangadakpan atol sa saturation drive nga gilusad nila ni Alalin diha sa sudlonong bahin sa Ponce 2 sa barangay Carreta.
Si Magallano ug Rosillas nakuhaan og mga drug paraphernalia atol sa operasyon niadtong Sabado sa gabii ug dihang miadto si Delfin diha sa maong dapit gikatahong kini maoy miduol kang Alalin diha sa Waterfront police station aron hayluon ang maong polis nga “aregluhon” nalang ang maong kaso.
Si Alalin nagkanayon nga wala siya mobungat og presyo apan si Delfin mipasalig nga iyang itunol ang kwarta inig balik niini.
“Ang ako adto gud giingnan namo ang mga dinakpan nga panawag sa ilang mga paryente aron modala og pagkaon. Daghan na silang nangabot duna pay mga babaye unya kining dakuon (Delfin) maoy nisulod sa opisina kung mahimo aregluhon lang kuno namo,” asoy pang Alalin.
Naatlan usab nga diha ang komentaristang si Jhunnex Napallacan kansang estasyunan diha ra sa likod sa Waterfront police station maong giimbitar kini sa maong polis aron mobarog isip saksi atol sa pagbayad unya sa suborno.
Tuod man miabot ang duha pagkaalas 12 pasado sa kaadlawon niadtong Domingo. Si Ripdos maoy gikatahong nagdala sa kwarta ug diha giihap niini ang walo ka tag lima ka gatos ug usa ka libong kwarta papel atubangan sa polis ug gibutang diha sa lamesa.
Diha-diha giposasan dayon ang duha ug gibalhog sa karsel. Kasong pagsuway og suborno sa awtoridad ang atubangon sa duha.
Ang duha dihang buot kuhaan og pamahayag kabahin sa hitabo midumili sa pagtubag gawas lang sa pag-ingon nga di sila mokomentaryo.