PO1 Condes giduphan ni Tomas

Gilabanan ni Mayor Tomas Osmeña ang polis sa siyudad  nga nakapusil og suspetsado sa pagpanunggab sa usa ka videoke joint diha sa Plaza Independencia.

Si PO1 Richard Condes nga niresponde sa alarma nipusil sa usa ka stonecraft worker nga si Richard Morales dihang kini midagan ug wala maminaw pagpasurindir human makadunggab.

Ang biktima nakaangkon og samad-pinusilan sa iyang tiil ug bat-ang ug gidali pagdala sa tambalanan apan si Morales nakabsan gyud sa iyang kinabuhi ug namatay.

Gihulagway sa ubang kritiko ang gibuhat sa pulis nga overkill tungod sa duha ka samad nga nahiaguman sa biktima.

Apan matud ni Mayor Osmeña nga walay butang nga matawag og overkill dungan sa iyang pagpahibawo pagsuporta kang PO1 Condes.

“There’s no such thing as overkill and the police should be commended for doing his job, we can’t allow our policemen to be paranoid,” sumala pa  sa mayor.

Alang kang Osmeña, “justifiable” ang gihimo sa pulis tungod kay ang suspetsado sa pagpanunggab nga napusilan gustong molighot sa kamot sa balaud.

“The suspect was running away knowing that he’s being pursued, he should kill him, for me, it’s justifiable if he shot him in the head,”dugang pamahayag sa mayor.

Gipadayag ni Osmeña nga suportahan sa kagamhanan sa dakbayan si PO1 Condes nga gipaubos na karon sa imbistigasyon.

“Of course we’ll support this guy, we support him all the way, we’ll even give him a bonus for doing his job,”nagkanayon ang mayor.