Napulo ka mga massage parlor sa uptown area ning dakbayan sa Sugbu ang gipadalhan na og warning sa buhatan sa Cebu City Anti Indecency Board (CAIB) labot sa ilang mga kalapasan.
Kini maoy gipahibalo ni Dr. Rene Josef Bullecer, tsirman sa CAIB sa dihang gikahinabi sa Banat News subay ning ilang pag-monitor sa mga establisamento sa mga spa, massage parlor, nightclub ug uban pa subay ning nagsingabot nga Sinulog.
Si Bullecer nagkanayon nga ang ilang gihimong monitoring niadtong miaging adlaw diin ilang gisugdan diha sa Fuente Osmeña ngadto na sa barangay Lahug nagpakita nga nakalapas gyud ang napulo ka mga massage parlor.
Si Bullecer miingon nga ang maong mga massage parlor adunay mga kalapasan ug usa na niini mao nga wala paggamit og swing door diin kanunay na kining naka-lock nga gidili man unta kini sa mga massage parlor.
Samtang nabantayan usab sa ilang team nga ang uban niini nigamit lang sa mga dimlights nga gidili kini aron usab malikayan ang pagduda nga adunay mga laing mga panghitabo gawas sa pagserbisyo sa masahe.
Gipadayag niini nga ilang gihingusgan karon ang pag-monitor sa tanang mga establisamento karong Sinulog, kini aron pagseguro nga dili makalusot kadtong mga tinunto sa ubang establisamento nga mohimo og mga law-ay nga buhat.
“Bantayan namo mao ang mga pagsugwak sa mga bisita panahon sa Sinulog diin expected usab nga aduna gyoy mga mugbog lupad nga modagsa dinhi sa Sugbu, ug gipanghinaot nga maminus-minusan ning ilang ilegal nga kalihukan nga kuyaw kaayong magdala og sakit,” si Bullecer miingon.
Matud pa niini nga “red alert” sila ug aduna nay mga polis nga gihatag sa Cebu City Police Office nga kabahin sa ilang tulo ka team nga mihimo’g pagmonitor sugod niadtong miaging Biyernes.
Ilang gi-warningan ang maong mga establisamento nga dili gyud mohimo’g mga malaw-ay nga kalihukan atol sa Sinulog, gumikan kay dili usab sila magmakuli sa pag-endosar ngadto ni Mayor Tomas Osmeña nga pasirhan ang ilang mga establisamento.