Migahi nang napalgan ang usa ka lalaki nga dunay samad pinusilan sa miaging buntag diha sa bukirang bahin sa Nug-as, Alcoy.
Gituohan sa kapolisan nga naalaan lang ang biktima sanglit nasuta nga walay kontra ug gani kun pasayawon sa videokihan mosayaw pa.
Si Roel Mendez, 38, lumad nga taga Malabuyoc ug kasamtangan nagpuyo sa balay sa bayaw diha sa Nug-as kinsa nakaangkon og pinusilan sa dughan ug abaga nga miresulta sa hinanali niining kamatayon.
Segun sa report nga gipadangat sa Cebu Provincial Police Office (CPPO) ang kapolisan nakadawat og report ug daling miadto sa dapit gipangulohan ni PO3 Agustin Romanos.
Sa imbestigasyon nagkanayon ang mga residente sa dapit nakadungog og duha ka sunod-sunod nga masipang buto sa wala matinong kalibre sa armas pasado alas 7 sa gabii niadtong Sabado.
Nianang pagka buntag naagi sa dapit sila si Jomar delos Santos, Junior Ybañez, Cocoy Amaca, Sonny Ocaña ug Junior Ceciban ug ilang nakit-an ang biktima nga nagbuy-od sa yuta.
Nagtuo ang maong grupo nga hubog lang ang naghigda apan sa dihang giduol ug gihikap nasuta nga migahi na ang biktima nga may samad pinusilan.