10 pa sa 12 ka out-of-town  contingent nakaparehistro

Mga 10  pa sa 12 ka mga out-of-town contingent nga mipasalig nang mosalmot sa Sinulog mardi gras karong Domingo ang pormal nga nakaparehistro sa Sinulog Foundation aron moapil sa grand parade.

Subay sa rekord sa Sinulog Foundation  ang 10 ka mga out-of-town contingent nga nakaparehistro na nga mosalmot naglangkob sa Sta. Catalina Negros Oriental, Bin Unido Bohol ug Tangub City Misamis Occidental alang sa Sinulog based Category (SB) ug ang laing pito alang sa Free Interpretation (FI) category.

Kini gilangkoban sa Himalalod Negros Oriental, Agusan del Norte, Hilongos Leyte, Camarines Sur, Sultan Kudarat, Penta Flores sa San Carlos City ug Iligan City.

Hinuon gibutyag ni Dolly del Mar, in-charge sa registration sa Sinulog Foundation  nga ang 25 ka mga contingent nga nakaparehistro na wala pa kini labot sa mga midaog sa milabay’ng Sinulog sa lalawigan ug dakbayan niadtong Sabado ug Domingo.

Matud ni del Mar mosaka pa ang gidaghanon sa mga contingent nga mosalmot sa Sinulog karong tuiga tungod kay sagad moparehistro ang ubang mga contingent ari na sa deadline karong Miyerkules sa alas 5:00 sa hapon.

Ang modaog sa Sinulog grand parade karong tuiga makadawat og P500 mil  nga ganti alang sa FI ug SB samtang tag P400 mil, P300 mil, P200 mil  ug P100 mil alang sa 2nd, 3rd, 4th ug 5th placer plus trophy.