Mananagat napalgang patay

Napalgang naglutaw sa dagat ang patay’ng lawas sa usa ka tawo  kinsa gituohang nalumos samtang namukot sa daplin sa kadagatan sa barangay Manang-as sa lungsod sa Badian.

Si PO2 Jeremias Elardo nga nahinabi sa Banat News miila sa biktima nga mao si Domingo Laurel, 58,  nga taga sitio Cabil-isan, barangay Taytay sa nahisgotang lungsod.

Matud pa niya nga alas 4 pasado ang takna sa hapon sa miaging adlaw nga namukot ang biktima sa kadagatan sa maong dapit.

Dugang pa ni PO3 Elardo nga gibati og katingala ang pamilya sa biktima sanglit buntag na nga wala kini mahiuli sa ilang panimalay.

Dihang ilang  gipangita maoy ilang napalgan ang patay’ng lawas sa biktima nga nag-ubo nga naglutaw nga namatay na.

Si PO2 Elardo miingon nga napalgan usab duol sa nahimutangan sa patay’ng lawas sa biktima ang giluwanan niining baroto nga diha na usab pipila ka mga isda nga nakuha sa pukot.

Sumala pa ni PO2 Elardo nga ilang gisugyot sa pamilya sa biktima sa pagpaubos sa autopsy sa patay’ng lawas alang sa pagsuta kun may foul play ba o wala ang kamatayon niini.