Hepe sa kapolisan sa dakbayan sa Talisay miawhag sa mga Talisaynon nga pormal nga mosumbong diha sa iyang buhatan kabahin sa mga taho nga adunay mga polis ang mangolekta og protection money gikan sa mga caretaker og mga makinang pasugalan.
Si Perigo mitataw nga wala siya makadungog kabahin sa maong taho apan mopahigayon siya og imbestigasyon kung adunay pormal nga mosumbong kabahin niini diha sa iyang buhatan.
Kahinumduman nga si Konsehal Arturo Bas, tsirman sa kahapsay ug kalinaw mitataw nga wala siya’y nadawat nga taho kabahin sa maong mga pasangil apan iyang susihon niini ang hepe sa kapolisan.
Ang hepe nagkanayon nga kung adunay matumbok nga mga pangalan sa mga polis kinsa giingong magdawatan og kwarta gikan sa mga caretaker sa mga karera iyaha dayon kining ipaubos sa imbestigasyon.
Si Perigo mipasangil nga adunay posibilidad nga ang mga nagbuhat og ilegal ang nagpakatap sa maong mga taho tungod kay naapektohan ang mga ilegal nga negosyo niini sa hugot nga kampaniya sa kapolisan batok sa mga video karera.
Apan gitataw usab sa hepe nga wala usab niya isalikway ang maong mga taho kay aduna usab kini posibilidad nga tinood ug tungod niini iyang i-monitor ang iyang mga sakop nga polis.
Niadtong Disyembre 8, 2007 ang kapolisan misunog sa mga makinang pasugalan nga ilang nasakmit ug human sa maong pagsunog ang mga polis sa siyudad nakasakmit na usab og walo ka video karera diin pito niini niadtong buwan sa Disyembre ug usa niining buwana.