Kadalanan hawanan sa vendors atol sa Sinulog Grand Mardi Gras

Si ABC president Eugenio   Faelnar, maoy gitahasan ni Bise Mayor  Michael Rama,uban sa mga kadagkuan sa Squatters Prevention Encroachment and Elimination Division (SPEED) maoy mohawan sa kadalanan alang na sa hamugaway nga pag-agi sa rota sa Sinulog Grand Mardi Gras karong pitsa 20 ning buwana.

Si  Fealnar nga gikahinabi sa Banat News miingon nga si Bise  Mayor Rama maoy mimando kaniya uban kang Vicente Mercado sa SPEED nga maoy mobungkag niadtong mga gagmay’ng tindahan daplin sa kadalanan.

Si Faelnar, nagkanayon nga gusto sa bise mayor nga kadto lang mga tindahan nga giuyunan sa Sinulog foundation ang makabutang sa kadalanan nga dili makabara sa kalihukan.

Samtang ang ilang mga sakop   nga mga job-order moapil usab sa pagbungkag niadtong mga gipangtukod nga  gagmay nga patunganan niadtong mga tawo nga buot molantaw sa Sinulog Parade.

Sumala pa niini nga dili sila motugot nga adunay mga pribadong tawo nga magbuot-buot lang og butang og kaugalingong patunganan sa ilang pagtan-aw nga kuyaw na hinuon kaayo sa disgrasya.

Samtang giklaro usab niya nga ang mga kapitan sa kabarangayan nga maigo sa rota sa Grand Mardi Gras iya nang gipadalhan og memorandum alang sa pagpakatap sa ilang mga tanod sugod karong petsa 19 ning buwana.

Gipanghinaot niini nga ang mga nahingtungdang kapitan motuman sa maong memorandum kini tungod ug alang sa kahapsay ug kalinaw sa Sinulog 2008.