Mga tulis sa Mandaue gipasangil ni Lumapas

Mga pagpanulis nga nahitabo sa miaging tuig sa dakbayan sa Mandaue lakip sa gipasangil ngadto kang Lauro Lumapas ug mga kauban gawas sa pagpanulis og taxi ug pagpamusil patay kang SPO1 Pedro Sucion ug grabeng pagkaangol ni PO2 Darius Conejos.

Si PO3 Arnold Quiatzon sa Investigation Bureau and Management Group (IBMG)  sa Mandaue City Police Office (MCPO) nga nahinabi sa Banat News kagahapon miingon nga daghan ang mga biktima sa pagpanulis nga naglakip sa usa ka babaye nga nakuhaan og P12,000 ug mga alahas ang mipatim-aw sa ilang buhatan ug mitumbok kang Lumapas nga maoy nagtulis kanila.

Giklaro ni Quiatzon nga kasong robbery ang giatubang ni Lumapas sa dihang ilang nadakpan niadtong tuig 2002 nga maoy hinungdan nga nabilanggo kini sa National Bilibid Prison.

Dugang pa niya nga sa miaging Hulyo 1, 2007 nakagawas si Lumapas ug mibalik na usab kini sa pagpanulis ug lakip sa gibiktima mao ang usa ka ginang sa panimalay nga nakuhaan og P12,000 ug mga alahas.

Dugang pa niya nga ilang giangan-angan ang pagpasaka og kasong murder, frustrated murder ug robbery kang Lumapas ug mga kauban sanglit ilang gidugangan ang mga dokumento alang sa pagpalig-on sa kaso.

Si PO3 Quiatzon miingon nga wala sila motuo sa pangangkon ni Lumapas nga duha lamang sila ka tawo nga nanulis og taxi ug wala kini modugang og lambigit sa mga kauban niini.

Matud pa niya nga lig-on kaayo ang mga testimoniya sa mga nakasaksi ug gikonpirmar kini sa drayber nga biktima nga gitulis ug nagtumbok sa mga suspetsado nga nagtulis kanila.