Nagpakita sa iyang pagkadismaya si Bise Mayor Lani Abarquez sa dakbayan sa Talisay tungod sa pag-aproba sa konseho sa siyudad sa resolusyon nga nag-awhag ni Mayor Socrates nga mohatag og financial incentives sa mga kapitan sa barangay sa siyudad kinsa mipahigayon og kalihokan batok sa mga video karera.
Matud ni Abarquez nga isip napiling mga opisyal sa barangay lakip sa ilang mga obligasyon ang paglimpiyo sa ilang mga lugar sa mga ilegal nga kalihokan ug ang video karera usa ka ilegal.
Si Abarquez nakapangutana nganong hatagan pa og incentive ang mga kapitan kabahin niini nga lakip man kini sa ilang trabaho.
Ang konseho sa dakbayan atol sa gipahigayong sesyon niadtong Martes mihangop sa resolusyon nga nag-awhag sa mayor nga mohatag og incentive ngadto sa mga kapitan kinsa makapahimo sa iyang barangay nga “video karera free” sulod sa usa ka tuig.
Ang maong resolusyon gipangamahanan ni Osmundo Manreal Jr. presidente sa Association of Barangay Council (ABC) diin nagkanayon kini ang paghatag og incentive ngadto sa kapitan usa sa pagpakita sa paghangop sa dakbayan ngadto sa mga kapitan sa kalihokan niini diin wala panumbalinga ang kakuyaw sa ilang mga kinabuhi.
Si Konsehal Alan Bucao sa iyang bahin nagkanayon nga angayan nga ang konseho mohatag og mga “criteria” isip qualification kung ang usa ka barangay tinood ba gyud nga “karera free”.
Si Abarquez nagkanayon nga kabahin usab sa mga kapitan nga iyang nahinabi mibutyag kini nga dili gikan sa ilang huna-huna ang incentive apan ang ilaha lang gusto mao ang “citation” kung makasakmit sila og mga video karera.
Ang bise mayor midungag nga dili siya supak kung gusto gyud sa siyudad nga mohatag og incentives apan iapil niini ang mga polis kinsa maoy implementing body sa pagsakmit sa mga makinang pasugalan ug ang mga tawo kinsa nagpaluyo sa operasyon batok sa maong mga makinang pasugalan.