Market admin may bahad vs vendors sa Pardo

Mibahad karon si Cebu City Market Administrator Racquel Arce pagsakmit sa mga baligya sa mga vendors nga mobalik pagpaninda diha sa gawas sa Pardo Public Market.

Partikular nga gitumbok ni Arce mao ang mga manindahay kansang mga structures nga gipangtukod, gipangguba sa Market Operations Division ug sa demolition team sa siyudad.

Niadtong Lunes, dul-an sa 30 ka mga illegal structures nga gipangtukod sa mga vendors kilid sa nahisgutang merkado publiko ang gi-demolish.

Matud sa city market administrator, nga ang mga stallholder mismo sa merkado maoy nangreklamo sa nahisgutang mga vendors tungod kay kini giingong nakigkompetinsya kanila.

Ang naapektahan sa demolisyon giingong namaligya usab og mga lamas, utanon ug uban pa nga mapalit sulod sa Pardo Public Market.

Nangreklamo ang gi-demolish nga mga manindahay tungod kay giingong sila nawad-an na og panginabuhian, gawas nga wala sila pakit-a sa kamanduan atol sa demolition.

Apan gipasabot ni Arce nga gawas nga dunay pagtugot sa mayor ang ilang gipahigayon nga demolisyon, dili usab lehitimo ang pagpaninda niini diha sa nahisgutang merkado publiko.

Tambag sa market administrator ngadto sa mga vendors aron dili mahasol sa ilang pagpamaligya, nga mosalmot sila sa bidding nga ipahigayon.

Kini aron makakuha og stalls ug adto na maninda sa ilang mga baligyang produkto sa ingon niini nga paagi dili na usab sila ireklamo sa lehitimong stallholders.

Apan miingon si Arce nga kun magdumili pagsunod ang mga vendors sa iyang sugyot, dili usab kini magbasol kung mobalik sa naandan nilang puwesto.

“Sa pagkakaron nahimo man na silang illegitimate, so, anytime nga mobalik sila sa pagpaninda amo gyud gihapon silang hiposon,” sumala sa city market administrator.

“Lisod man kaayo kun ato na silang pasagdan, manggawas usab unya nang atong mga stallholders diha, mosamot ang atong problema,” dugang pasabot ni Arce.

Buot lang sa market administrator nga mapatuman ang mga lagda alang sa kamerkaduhan sa dakbayan alang usab sa kalimpyo ug kahapsay niini.