Tulisan nakapatay sa polis nailhan na

Nailhan na sa kapolisan sa dakbayan sa Mandaue ang usa sa tulo ka suspetsado mipusil patay ni SPO1 Pedro Sucion ug miangol ni PO2 Darios Conejos atol sa pagresponde sa usa ka alarma sa milabay’ng Domingo sa kaadlawon.

 Matud pa ni  Sr. Insp. Sigfred Toribio,  hepe sa Station 1 sa kapolisan sa Mandaue nga base sa pipila ka mga saksi nga ilang nakuha mitumbok kini sa suspetsado nga si Lauro Lumapas Jr. usa ka bangiitang tulisan nga anaa sa listahan ug gallery sa Mandaue City Police Office apan  hangtod karon padayon pa sila sa imbestigasyon aron  sa pag-ila sa laing duha.

 Si Lumapas aduna kini pending nga kasong murder sa  Regional Trial Court Mandaue ug  nalutsan og warrant of arrest gumikan sa pagpusil sa usa ka amahan nga iyang gitulis samtang nagunit kini sa  anak sa milabay’ng   Disyembre 2007.

 Human nga giduso ni MCPO Director  Sr. Supt. Rodel Calungsod ang kaso ngadto sa Intelligence and Detection Management Section   (IDMS) sa MCPO padayon karon ang pagpangita sa dugang mga saksi alang sa paghulagway sa duha pa ka kauban ni Lumapas nga mipusil  patay ni SPO1 Sucion ug miangol ni PO2 Conejos.

 Kagahapon sa buntag si PRO7 Director  Chief Supt. Ronald Roderos mibisita ni PO2 Conejos sa tambalanan alang sa pagsusi sa kahimtang niini ug mideretso kini ngadto sa panimalay ni SPO1 Sucion sa Sitio Calumay,  barangay  Labogon, dakbayan sa Mandaue ug nakighimamat kini sa nabiyudang si Charlene Sucion ug anak niini nga si Charise.

 Si Roderos mipadayag nga ang PNP adunay ikahatag nga financial assistance ngadto sa duha ka mga biktima ilabi na sa ilang mga magasto sa haya ug lubong ni Sucion ug sa mga gikinahanglan ni PO2 Conejos sa tambalanan, apan wala pa kini mobutyag sa kantidad nga ihinabang sa PRO 7.

 Samtang si Mandaue City Mayor Jonas Cortes ug Bise  Mayor Carlo Pontico Fortuna mohatag na usab sa ilang hinabang pinansiyal apan wala pa gihapon kini mohatag og kantidad gumikan kay ila pa kining ipaabot ngadto sa hawanan sa konseho atol unya sa ilang sunod nga regular session.

 Kahinumduman nga si SPO1  Sucion ug PO2  Conejos miresponde sa usa ka alarma sa tulis nga nahitabo sa usa ka taxi didto sa Mandaue Reclamation Area  duol sa Cebu International Convention Center ug sa ilang pag-abot sa maong dapit usa ka traysikol nga gitumbok nga maoy gisakyan sa tulo ka mga suspetsado ila kining gisita.

 Sa dihang miduol si  Sucion sa maong traysikol aron sa pagsusi kun kinsa ang sakay kalit lang kini nga gipusil tumong sa ulo hinungdan sa kamatayon ni Sucion, samtang si Conejos nga maoy mi-back-up ni Sucion gipusil usab sa naglingkod nga pasahero luyo sa drayber sa maong traysikol ug sa dihang mibunot si Conejos sa iyang armas wala kini makabuto gumikan kay nakasafety pa ang armas niini samtang nagsige og pusil ang suspetsado ngadto kaniya hinungdan sa pagkalandig niini sa tambalanan.