SPO1 Sucion gihilantan atol sa pagkamatay
Gihilantan ang polis nga napatay dihang mi-duty niadtong gabhiuna sumala pa sa iyang asawa nga si Charlene dihang gihinabi sa mga sakop sa tigbalita kagahapon, ug gikatakda untang mo-file og early retirement kagahapong adlawa.
Si Charlene nagkanayon nga niadtong adlaw’ng Sabado gihilantan na ang iyang banang si SPO1 Pedro Sucion ug iya kining gipugngan nga motrabaho, gani hasta ang ilang nag-inusarang anak nga si Pritz Charisse,17, mitabang sad og pugong sa amahan.
“Amo gani siyang gigakos-gakos kay di nako siya patrabahuon kay gihilantan man, gihilot-hilot sad siya sa among anak pero giingnan raman ko nga ‘ako may señor so kinahanglan ko didto.Mahingawa lagi daw siya sa trabaho,” asoy pang Charlene.
Sumala pang Charlene si Sucion mao ray nagtrabaho para kanila samtang siya naninda sa gamay nilang tindahan diha sa ilang balay sa sitio Canumay sa barangay Labugon sa dakbayan sa Mandaue.
Ang ilang anak kasamtangang nagtungha sa 1st year sa kursong nursing diha sa University of the Visayas College of Nursing, matud pang Charlene si Sucion mismo ang mamalantsa sa uniporme niini ug sa ilang anak.
Kini usab ang katabang niini sa pag-andam sa ilang panindang barbeque diha sa ilang tindahan ug kauban kanunay sa pagpangompra sa Carbon og mga paninda.
Kagahapon mao ray gipangayo ni Charlene mao ang hustisya pinaagi sa pagkasikop sa mga responsableng mipatay sa iyang bana nga mga tulisan.
“Tabangi sad mi sir nga madakpan ang nipatay niya,” naghilak nga nagpakiluoy ang asawang Sucion kang Roderos kagahapon.
Si Sucion ug PO2 Darius Conejos mitubag sa alarma niadtong milabay’ng Domingo sa kaadlawon diha sa dalan FF Cruz sa reclamation area sa Mandaue.
Si Chief Supt. Ronald Roderos miadto sa panimalay ni Sucion kagahapon ug mitaod sa ‘posthumous medal’ sa kapikas sa maong polis ug mipasalig nga madawat sa pamilya ang mga benepisyong angayan nilang dawaton.
Gipasaligan usab ni Roderos ang anak ni Sucion nga kini makatiwas gihapon sa kurso tungod kay gastuhan sa PNP ang pagtungha niini.
Misaad si Roderos nga ilang hatagan og hustisya ang nahitabo kang Sucion.
Samtang sa laing bahin, gihatagan usab og hinabang ug gitauran sa “Medalya ng Sugatang Magiting” si Conejos diha sulod sa iyang lawak sa
Si Conejos mitug-an sa mga tigbalita kagahapon nga nagtoo siyang mao na kini ang iyang katapusan.
Ang asawa ni Conejos nga si Thelma mapasalamaton usab sa maong hinabang ug sa pasidungog nga nadawat sa bana.
Nasayran usab kagahapon nga sukad pa niadtong bulan sa Agosto wala na magdawatan og sweldo si Conejos tungod kay gisuspenso kini niadtong milabay’ng tuig og unom ka bulan sa korte tungod sa kasong sibil nga gipasaka kaniya sa iya rang mga paryente.
Niadtong Agosto napupos ang maong silot apan hangtud ning panahuna wala gihapon siya ma-reinstate gikan sa pagkasuspenso tungod kay wala niya mahikay ang mga papeles kabahin sa pagkapupos sa suspensiyon niini.
- Latest
- Trending
