Negosyante naningil, gitigbas hinuon

Naangol ang usa ka negosyante og manok  nabiktima sa pagpanigbas sa miaging gabii sa dalan A.C. Cortes Avenue sa barangay Alang-Alang, dakbayan sa Mandaue.

Si P01 Chester Quiros miila sa biktima nga mao si Benjie  Flores,   taga barangay Paknaan, dakbayan sa Mandaue.

Ang suspetsado giila niya nga mao si Lito Narte, 27,minyo ug nagtrabaho sa   usa ka lechon store nga nahimutang sa barangay Alang-Alang sa maong dakbayan.

Matud pa ni P01 Quiros nga naningil ang biktima sa balayranan sa gi-deliver nga manok ngadto sa suspetsado apan wala kini kabayri  hangtod nga nagkalalis.

Wala makapugong sa kasuko si Narte, nagdali kini sa pagkuha og sundang ug gitigbas ang biktima sa makadaghan nga higayon.

Ang biktima dali nga gidala sa Mandaue City District Hospital ug nagpatambal   ug gikataho usab nga luwas na sa kuyaw nga kahimtang.

Ang suspetsado nadakpan sa kapolisan.