Mga boring Midagsa sa Reclamation Area

Daghang mga ginang diha sa dakbayan sa Mandaue ang gibati karon og kabalaka gumikan sa namatikdan nga hilabihang pagdagsang sa mga babaye nga nagbaligya sa ilang dungog diha sa ilang dakbayan.

Ang maong mga babaye nga wala pa matino kung diin gikan apan gituuhang diha ra mag-anhaan aron mobaligya sa ilang lawas bugti usab sa P200 ngadto sa P100 ang kantidad nga ibayad kanila.

Ang maong    mga boring nga mga babaye ang magtapok sa panahon sa gabii duol sa usa ka motel sa reclamation area diin sa duol usab mahimutang ang gagmay nga tindahan nga maoy ilang gihimong estambayanan.Si PO1 Chester Quiros nga nahinabi sa Banat News mikumpirma sa pagdagsang sa mga boring miingon nga gawas sa pagpamoring duna say mga reklamo ang mga lalaki nga kustomer  ila usab biktimahon og kawat og pitaka, cellphone ug uban pa.

Matud pa niya nga daghan na ang biktima nga mga lalaki nga natintal sa mga babaye nga magpanawag og mga lalaki nga molabay sa maong dapit sa panahon sa gabii.

Si Quiros miingon nga si Sr. Insp. Segfred Toribio, hepe sa presinto 1 sa Centro Police Station ang nagdestino na og mga polis  nga magpatrolya sa maong dapit panahon sa gabii.

Apan bisan paman niini padayon gihapong wala mahunong ang prostitusyon sa maong dapit.

Giangkon niya nga sukad sa gihimong pagpatrolya sa maong dapit wala pa silay nadakpan sanglit ang mga polis lamang usab ang gibantayan sa maong mga boring.

Sa dakbayan sa Sugbu, bisan paman sa kanunay’ng pagpanakop sa kapolisan sa mga bugaw ug mga babayeng mugbo og lupad padayon gihapon sila sa ilang trabaho.

Kini gumikan kay walay alternatibong kapangabuhian nga ilang kaduolan ug ingon man walay sektor nga nitagana gyud og taas nga panahon aron gyud sila matabangan.

Pipila kanila makita diha sa barangay Kamagayan, sa dalan Ramos duol sa usa ka hotel, diha sa dalan Leon Kilat ug ingon man barangay Camputhaw.

Sa panahon nga sila madakpan nagproblema ang kapolisan gumikan kay dili motug-an sa ilang tinuod nga pangalan ug sa higayong sila madakpan pag-usab laing pangalan na usab ang ilang gamiton.