Rambol sa beach

Nagkatibulaag ang mga kustomer sa Ocean Pearl Beach Resort sa barangay Marigondon, dakbayan sa Lapulapu sa dihang kalit lang nga nag-rambol ang grupo sa bagsik nga mga lalaki ug usa ang nadunggaban kinsa gialegar nga nagpailang opisyal sa  Criminal Investigation and Detection Group (CIDG 7).

Si PO3 William Humoc sa Homicide Section miila sa nadunggaban nga mao si Patrict Cabizares, 33,  ug nagtrabaho isip security  inspector sa usa ka dakong  mall sa dakbayan sa Sugbo.

Matud pa niya nga ang gika-engkuwentro sa grupo ni Cabizares mao ang grupo ni Enrico Dionson, hingkod ang panuigon nga usa ka  magpapatigayon nga taga Highway 77 sa barangay Talamban, dakbayan sa Sugbu.

Si Humoc miingon nga gialegar sa grupo ni  Dionson nga si Cabizares nagpaila nga sakop sa CIDG  7 apan nahibaw-an nga inspektor lamang kini sa mga security guard sa usa ka mall.  

Nagsugod lang sa walay  pagsinabtanay sa duha ka grupo nga  nagkaabot sa maong dapit nga maoy nakaingon sa panaglalis hangtod nga misangko sa pagsinumbagay, pagbinunalay ug ingon man sa  pagpanunggab.

Si PO3 Humoc miila sa pipila ka mga kauban sa grupo ni Cabizares nga naglakip kanila ni Roly Amores, Noel Camaresta ug Absalon Serna.

Samtang pipila lamang usab ang nailhan sa habig ni Enrico Dionson nga naglakip kanila ni Jose Coca, Nerie Dionson Joel Boming ug Jesson Luste.