90 ka pasahero naluwas sa Poro

Hapit malunod ang laing motorbangka nga nagbeyahi-an paingon sa isla sa Camotes kagahapong adlawa human maguba ang katig niini nga niresulta sa pagkabadbad sa gihigot nga nylon og pagkaputol sa timon sa maong bangka diha sa kadagatan sa Santiago Bay sakop sa maong isla  pasado alas 11:00 kagahapon sa buntag.

Nasayran gikan kang Leo Magalong sa Coastguard detachment nga nagbase sa Poro Camotes nga naluwas ang gibanabanang 50 ngadto sa 90 ka pasahero  sa M/B Junmar-2 ug pasado ala una sa hapon nakaabot sa pantalan sa isla sa Camotes.

Ang M/B Junmar-2 gipanag-iya ni Mario Pagalon lumad nga taga Pilar Camotes apan atua na magbase sa Ormoc karun.

Matud ni Magalong naputol ang nylon nga naghigot sa katig ug naputol ang timon hinungdan nga hapit malunod ang maong barko tungod sa kakusog sa bawod ug hangin.

Matud ni Magalong paingon na unta silang mopadala og pumpboat aron maoy mo-rescue sa mga pasahero apan wala kini mahinayon human nitawag sa ilang buhatan ang tag-iya sa maong bangka nga si Mario Pagalon.

Nitawag ang tag-iya human naayo og balik sa mga crew niini ang naputol nga pisi ingon man ang nabali nga timon ug nakapadayun kini sa ilang biyahe.

Nigikan ang maong bangka sa pantalan sa Mandaue alas 7:00 sa buntag gitakda unta kining moabot sa pantalan sa Camotes alas 11:00 sa buntag apan nalangay kini og 3 ka oras gumikan sa maong trahedya.

Si Abel Garciano sekretarya sa mayor sa Pilar mitug-an sa mga tigbalita nga   modunggo ang motorbangka sa Puerto Bello sa San Francisco o ba kaha sa lungsod sa Poro.

Nidugang si Garciano nga dili lang usa ka lugar ang dunggoan sa Junmar-2 kundili modunggo usab kini sa Pilar, San Francisco.

Samtang gihimakak hinoon ni Magalong  nga  overloaded ang maong bangka tungod kay moabot sa 200 ka pasahero ang capacity niini.

Nasayran sa Banat News sulod sa Radio Room sa Operations Branch sa Cebu Provincial Police Office nga duha sa 90 ka mga pasaherong sakay niini mga polis nga sila si PO1 Abelardo Biton ug PO1 Rirchie Camillo, pulos nadistino sa Pilar Police Station kinsa maoy daling nitawag ngadto sa ilang kauban sa police station ug nagpahibalo sa ilang gidangatan.

Samtang gitug-an sa usa sa mga pasahero nga si Rho Salazar Camacho atol sa interview sa Bantay Radyo nga naratol ang uban nilang mga pasahero ug nagtaud na  og life jacket pagpangandam kun nalunod pa gyud ang maong bangka.

Matud niya wala siya magtuo nga maluwas pa niadtong higayuna gumikan sa kakusog sa bawod ug hangin samtang nag-lutaw lutaw nalang ang banca nga ilang gisakyan human maputol ang higot sa katig ug mabali ang timon.  (Ug Rey B. Pasaporte)