Gipatay sa selosong kapuyo

Gumikan sa gituuhang hilabihang selos napatay sa lalaki ang iyang kapuyong babaye nga usa ka tindera sa dakong establisamento sa dakbayan sa Sugbu human sa ilang mainitong panaglalis pasado alas 11 sa gabii sa ilang pinuy-anan diha sa sitio San Juan, sa barangay Inayagan dakbayan sa Naga.

Ang kapolisan nagkanayon nagsugod ang panaglalis sa biktima ug sa suspek tungod kay dugay kaayong nakauli ang biktima gikan nitrabaho.

Samdan sa tiyan ang biktimang si Jennifer Regis, 25, usa ka tindera sa usa ka department store isip usa ka beauty consultant  sa usa ka mall dakbayan sa Sugbu, gitumbok nga nipatay ug nagtingkagol na karun sa detention cell human misurender ang kapuyo niining si Henry Tapic, 26, walay trabaho.

Base sa pamahayag sa mga residente naghulat sa waiting shed pasado alas 10:00 sa gabii ang suspek sa biktima aron mamauli sa ilang balay.

Sumala pa sa tawong unang gitug-anan sa suspek nga giilang si Jack Villareal, tanod sa maong barangay nga gituok una sa suspek una pa gidunggab ang biktima diha sa koto-koto gamit ang kitchen knife ug dali kini niyang gitabunan og habol human makabsan sa ginhawa ang biktima.

Sumala pa sa mga silingan nga nahinabi sa Banat News unom na ka tuig ang relasyon sa duha ug duna na silay usa ka 6-anyos nga anak nga lalaki.

Gikatahong sulod sa maong katuigan namatikdan nga kanunay silang mag-away tungod sa pagkaseloso sa suspek.

“Uyab selos ko, akong giluok, gidunggab,” sumala pa sa suspek nga gihinabi sa Banat News diha sa iyang karsel kagahapon.

Sa report sa kapolisan nga naabot sa Cebu Provincial Police Office ang biktima ug suspek grabeng naglalis niadtong higayona gani gituuhang naglayugay pa ang duha base usab sa nakitang mga kinawrasan diha sa mga bukton ug nawong sa suspek nga gituuhang binuhatan sa biktima.

Nagtuo ang kapolisan nga nagselos ang suspek ngadto sa iyang kapuyo ug atol sa ilang panagbugno nahinaykan kini ug napatay.

Daling gihatud si Regis sa Minglanilla District Hospital apan gideklarar kining patay nang daan sa mga doktor nga miatiman kaniya sa nahisgutang tambalanan.

Segun sa alegasyon ni Tapic nga siya maoy giunhan og dunggab sa iyang kapuyo ug iyang nailog ang kutsilyo hangtud nga wala siya makapugong hinungdan nga iya kining nadunggaban.

Apan sa teorya sa kapolisan sila nagduda nga posibleng nisuway og hikog si Tapic pinaagi sa paglaslas sa iyang pulso human niya mapatay ang kapuyo.

Ang patay’ng lawas sa biktima gitakdang ipailawom sa awtopsiya sa kapolisan samtang giandam na kagahapon ang kasong homicide batok sa suspek.  (Uban sa reports nila ni Lowella May Lastimosa ug Julie Christy Barredo)