6 ka mananagat nasikop sa Cordova

Unom ka mga tawo nasikop sa ilegal nga pangisda didto sa baybayon sa Barangay Day-as lungsod sa Cordova sa milabay'ng gabii.

Ang nasikop mao sila  si Romy Matidios, 39, Bartolome Nuñez, 43, Esteban Sumalinog, 36, Sabino Ligan, 32, Miquidillo Cañete ug Ernesto Sumalinog, 35, minyo, diin ang tanan mga residente sa Barangay Pilipog, lungsod sa Cordova.

Matud pa ni Cecilio Ursal, chairman sa Cordova Marine Watch (CMW) samtang nagpatrolya sila sa maong dapit mga alas 10:25 sa milabay'ng gabii ilang nakita sa akto nga miladlad kini sa ilang mga dalang gagmay og  mata nga pukot hinungdan ila kining gisugo sa pagsikop lakip ang kinuha niini nga mga isda ug ang pumpboat niini isip ebidensiya sa kasong ipasaka batok sa upat ka mga mananagat.

Matud pa ni Ursal nga dako kini nga kalapasan sa pagbutang og gagmay'ng mata sa pukot hinungdan sa pagkaapil sa mga similya sa isda sa kadagatan.

Gumikan niini, ang unom gidala sa police station sa lungsod sa Cordova ug pasakaan kini og kaso base sa salaod nga ilang nahimo.