Babaye gipusil

Milapos ang bala sa paa sa usa ka babaye kinsa gipusil sa atubangan ang iyang kapuyo nga lalaki nga ang sumbohan sa armas gipalusot lang sa lungag sa bongbong sa panimalay nga gipuy-an niini.

Ang pagpamusil nahitabo alas 8 pasado ang takna sa miaging gabii sa  Poblacion, lungsod sa Alcoy.

Ang biktima mao si Mercedeta Capote, 23,  kinsa kauban ni  Mario Seseban nga iyang kapuyo nga diha sa ilang panimalay dihang nahitabo ang pagpamusil.

Si PO2 Dexter Basergo nga nahinabi sa Banat News miingon nga nagtuo sila nga ang kapuyo nga si Mario maoy tuyo nga pusilon apan si Mercedeta maoy naigo.

Dugang pa niya nga panimalos ang nag-unang anggulo nga ilang gisubay nga naglambigit usab sa nahitabong pagpamusil kang Ruel Antig sanglit ang usa sa mga suspetsado mao man ang pag-umangkon sa kapuyo niini.