42-anyos nalumos

Patay ang usa ka 42-anyos nga lalaki human kini giingong nalumos niadtong Martes sa hapon dihang naligo sa dagat sa usa sa mga beach resort sa dakbayan sa Talisay.

Ang kapolisan sa dakbayan miila sa nalumos nga si Wilfredo Baroquillo, ulitawo, taga Barangay Lorega San Miguel niining dakbayan.

Base sa imbestigasyon sa mga polis nga si Baroquillo uban sa iyang higala nga si Jillford dela Cuesta kinsa ang duha  nag-inom  diha sa baybayon sa wala pa mahitabo ang aksidente.

Dihang nahubog na si Baroquillo giagni kini ni dela Cuesta nga mopauli na apan ang maong biktima wala mamati ug naligo gyud kini sa dagat.

Pila ka minuto ang milabay napalgan na lang si Baroquillo sa ubang mga nangaligo nga milugdang na kini diha sa dagat.

Si Baroquillo ang daling gipaubos sa first aid ug gidala dayon sa Talisay district hospital apan gideklara kining patay na sa doktor sa pag-abot sa maong tambalanan.

Ang patay’ng lawas ni Baroquillo ang gidala diha sa Cebu Memorial Funeral Homes niining dakbayan.