Mas mikunhod og 43 porsiyento ang mga kaso sa aksidente sa pabuto dinhi sa Central Visayas atol sa pagsugat sa Bag-ong Tuig kun itandi sa milabay’ng mga katuigan.
Subay sa rekord gikan sa Department of Health (DOH-7) duna lay 67 ka mga kaso sa aksidente sa pabuto gikan sa Disyembre 21 hangtod na sa Enero1.
Matud ni Department of Health-7 regional director Susana Maderieta mga 51 niining maong mga kaso nahitabo atol sa pagsugat sa Bag-ong Tuig ug 16 niini sa milabay’ng Pasko.
Giklaro sab ni Maderieta nga walay aksidente sa pagpataka og pabuto sa armas kun stray bullets ang ilang namonitor dinhi sa Central Visayas atol sa pagsugat sa Bag-ong Tuig.
Nagtuo si Maderieta nga ang hiniusang kampanya tali sa ilang ahensiya, Philippine National Police (PNP) ug Department of Education maoy nakatabang og dako pagpaminos sa mga biktima sa pabuto karong Pasko ug sa pagsugat sa Bag-ong Tuig.
Gituohan usab niya nga posebling naka-amgo na ang publiko nga inay mopalit og mga firecrackers mas gihatagan nila og importansiya ang pagpalit og mga pagkaon.
Matud ni Maderieta nga mga minor injuries lang ang sagad naangkon sa mga biktima sa pabuto ug wala say nakalas nga kinabuhi.
Niining 67 ka mga kaso sa aksidente sa pabuto atol sa Pasko ug Bag-ong Tuig ang nag-una niini mao ang dakbayan sa Sugbu, Mandaue ug Lapulapu.