Gisalikway sa Nagkahiusang Drayber sa Sugbu (Nadsu) ang paggamit og Liquefied Petroleum Gas (LPG) sa ilang mga jeep de pasaheroan.
Ang paggamit og LPG giingong usa ka alternatibong solusyon nunot sa nagpabiling taas nga presyo sa mga produktong petrolyo.
Gani ang maong lakang giduso usab ni Senador Miguel Zubiri tungod kay gawas nga mas barato itandi sa gasolina kini giingong environmental friendly.
Apan matud sa secretary general sa Nadsu nga si Ruben Rama, dako ang deperinsiya sa paggamit og LPG gikan sa gasolina.
Giklaro ni Rama nga duna nay mga PUJ operator sa Sugbu nga misuway og gamit og LPG sa ilang mga unit, apan wala makauyon niini.
“Matud nila nga dako kuno kaayo og deperinsiya sa pagpamasahero, hinay kuno mudagan ang sakyanan hinungdan nga nibalik sila sa gasolina,” sumala pa ni Rama.
“Mag-unsa man nang makadaginot ka sa kunsumo sa sakyanan unya alkanse ang mga drayber sa pagpamasahero, dili kabayad sa abang,” dugang pasabot ni Rama.
Alang sa secretary general sa Nadsu wala nay laing alternatibong solusyon sa nagpabiling taas nga presyo sa lana kun dili ang pagbasura sa Oil Deregulation law.
Gawas sa maong lakang, ang Nadsu uban sa nagkadaiyang transport group, nangayo na og usbaw sa minimum nga pletihan.
Gitataw ni Rama nga dugay ra nga nanawagan niini ang mga driver ngadto sa gobiyerno, apan kini giingong wala magpakabana.
Subay niini gipadayag ni Rama nga kun walay matuman sa ilang mga demanda, sila mapugos pagpahigayon og transport strike sunod buwan.
Nagtuo si Rama nga pinaagi sa pagpahigayon og welga madungog sa kagamhanan ang sentimento sa mga drayber.
Miingon si Rama nga dili sila gusto nga makahatag og kahasol sa mga sumasakay, apan giingong gikinahanglan usab nga sila paminawon sa gobiyerno.