Sayop nga resulta sa barangay ug SK resolbahon – Buac

Patubagon na karong unang semana sa Enero ang mga complainant ug respondent nga mikandidato sa milabay’ng barangay ug SK election nga sayop ang pagproklamar nga dili  tinuoray’ng mananaog.

Si Comelec regional director  Rey Rene Buac nga gikahinabi sa Banat News miingon nga si Commissioner Resurreccion Borra kinsa miduaw dinhi sa Sugbu niadtong milabay’ng Huwebes ug Biyernes miklaro nga ilang  desisyonan sa unang semana sa Enero ang tanang sayop nga proklamasyon.

Gipasabot niini nga sa pagsugod sa Enero ilang ipahigayon ang pag-raffle sa maong mga invalid proclamation kini aron usab makalingkod na ang tinuoray’ng midaog sa barangay ug SK election niadtong Oktubre 29.

Matud pa niini nga ang matag habig gihatagan gyud nila og due process sa balaod nga makaduso sa ilang tagsa-tagsa ka rason sa sayop nga proklamasyon.

Hinuon iyang gitataw nga ang pagpreparar sa maong mga invalid nga  proklamasyon unya sa tinuoray’ng mananaog ang mga magtutudlo maoy mihan-ay niini ug ang mga election officer sa dakbayan ug mga kalungsuran igo lang miabag sa proseso.

Dugang pa niini nga ang maong mga naproklamar nga sayop makadawat sa ilang suholan kini kun nakalingkod human sa eleksiyon hangtod na sa Enero sa sunod tuig.