Duha ka mga lalaking giingong mga guns-for-hire ug ang ilang “mastermind” ang nangadakpan sa kapolisan human ang duha ka sinuhulan pagpatay nabantayan ug daling gipadakop kagahapon sa kaadlawon samtang nagpaabot sa biktima.
Kabomberohan molibot unyang gabii
Higpit nga gipahimangnoan sa kabomberohan ang katawhan nga dili pagpataka og paboto unya sa tungang gabii sa pagsugat sa Bag-ong Tuig aron kalikayan ang katalagman sa sunog.
Si Mandaue City Fire Marshall Oscar Mayol nga nahinabi sa Banat News miingon nga angay likayan ang pagpaboto duol sa daghang kabalayan nga ginama sa light materials sanglit kuyaw man nga adto motugpa ang paboto nga nagdala og kalayo.
Giawahag ni Mayol ang mga lumolupyo sa kabarangayan sa dakbayan nga anaa mahimutang ang nagsikitsikit nga kabalayan sa pagpundo og daghang tubig nga magamit sa dinaliang pagpawong niini.
Si Mayol miingon nga ang ilang pagpahimangno ilang ipadayon hangtod sa dayon na sa takna pagsugat sa Bag-ong Tuig pinaagi sa pagpadagan sa ilang fire truck nga magdala og public address system.
Nunot sa higpit nga pagpahimangno sa kabomberohan alang sa paglikay sa sunog ang kapolisan sa dakbayan higpit usab ang pagbantay sa mga manindahay og paboto.
Gidid-an ni Senior Superintendent Rodel Calungsod ang mga manindahay og paboto sa pag-display sa ilang paboto sa merkado publiko sukad Pasko ug karong adlawa.
Ang mga vendor nagpahimutang sa ilang mga payag-payag nga nagladlad og paboto sa dalan Jose Rizal sa Ibabao Estancia ug dalan A.C. Cortes sa Ibabao sa maong dakbayan. (Romeo T. Limpangog)