Mga building way peligro: OBO

Gipasalig sa mga opisyal sa Office of the Building Official (OBO) nga luwas ug layo sa peligro nga malusno ang mga dagkong edipisyo ning siyudad nga suroyanan sa daghang tawo.

Giluwatan ang maong pasalig ni Engr. Victor Acenas sa OBO agi’g tubag sa daghang kabalaka sa publiko basin may mga edipisyo dinhi nga dili luwas sa panahon nga magdaghan ang tawo.

Kasagaran sa gikabalak-an sa katawhan mao ang mga department stores , mga tag-as nga condominium ug mga hotel nga maoy dangpanan sa daghang tawo panahon sa Pasko, pagsugat sa Bag-ong Tuig o kaha sa Sinulog.

Matud pa ni Acenas nga walay angayang kabalak-an ang katawhan niini sanglit una hatagi og building permit ang usa ka tukorong edipisyo, gisusi sa taga OBO ang katibuk-ang desinyo niini.

Gitun-an   ang  pundasyon  pagsuta sa hustong sukod uban sa mga materyales nga gamiton niini.

Kun mahuman na usab og panday ang usa ka edipisyo, gisuta usab kini kun natuman ba ang tanang espisipikasyon kon ang tanang nahimutang sa structural plan niini.

Sa panahong aprobado na sa taga OBO ang katibuk-ang pagkatukod sa nahuman nga building, anha pa kini luwati og certificate of occupancy nga nagpasabot nga luwas na sa kadaot ang mga mopuyo niini.

Sa bahin sa mga karaang edipisyo, si Acenas miingon nga sa maong bahin kaabag sa taga OBO ang mga nanagpuyo o kaha nag-abang sa maong edipisyo sa pagmonitor niini ilabi na kun mga gabok na ang mga dapat niini.