Patay ang usa ka tres-anyos nga batang lalaki ug naangol usab ang usa ka pito ka bulang mabdos human aksidenteng mibuto ang armas sa usa ka polis nga sakop sa Service Security Group sa Cebu City Police Office kagahapon sa udto.
Ang namatay giilang si Shane Kent Bel Lonzaga,kinsa naigo diha sa dughan ug wala na makaabot nga buhi sa Cebu City Medical Center samtang ang naangol mao si Brenda Siarez, 34, kinsa mabdos og pito ka bulan, pulos residente sa sitio Quadrangle sa barangay Lorega-San Miguel ning dakbayan.
Samtang malinawong mitahan sa iyang opisyal si PO3 Benjamin Herbias, sakop sa SSG human sa insidente lakip na ang usa ka snubnose revolver nga .357.
Sumala pang SPO4 Alex Dacua, imbestigador sa Homicide Section sa pakighinabi sa Banat News ang maong polis padulong na mo-duty niadtong tungura ug naggunit sa iyang armas aron unta isulod sa iyang pouch bag diha sa hawak.
Gikatahong sa pag-abli ni Herbias sa pultahan diha usab sa iyang tupad si Siarez ug wala tuyoa napakong ang kamot ni Herbias nga nagunit sa maong pusil ug nakablitan ang gatilyo niini.
Unang naigo sa walang bagtak si Siarez kinsa nalup-og dayon tungod sa samad hinungdan nga gidali ni Herbias og aswat ang babaye aron dad-on sa tambalanan.
Apan sa ilang pagkanaog diha nalang nila naagii diha sa silong nga nagkadugo usab si Lonzaga diha sa dughan ug gitabang sa inahan niining si Vilma Entera maong gisultihan ni Herbias ang naulahi nga dad-on dayon ang bata sa tambalanan.
Nasuta nga ang bata kasamtangang natulog niadtong tungura diha ibabaw sa lantay samtang diha ra usab sa duol ang iyang inahan dihang kalit nga mipaka ang usa ka buto sa armas gikan sa ikaduhang andana sa balay.
Gipasabot ni Dacua nga si Lonzaga anak sa pagkadalaga ni Entera sa Hapones niining unang bana, apan ang apelyedo sa bata nga gidala mao ang iyang kapuyo kaniadto.
Si Siarez luwas na sa kakuyaw apan si Lonzaga gideklarar nga dead on arrival sa CCMC.
Si Sr. Supt. Patrocinio Comendador mitug-an sa mga tigbalita nga disarmahan si Herbias ug pasakaan og kasong kriminal ug administratibang serious grave misconduct.
Matud pang Comendador nga si Herbias shooting champion ning bag-uhay lang ug karon usa na ka range officer diha sa Cebu City Police Office aron magtudlo sa mga polis kabahin sa gun proficiency ug gun safety.
Apan matud pang Comendador aksidente ang nahitabo ug dili matagna kung kanus-a kini mahitabo bisan paman nga usa ka range officer si Herbias.
“He is more than capable and knowledgeable in safe handling of firearms. He knows what to do considering that he is a range officer but accidents do happen,” pagpasabot pang Comendador.
Si Herbias kasamtangan karong gikustodiya sa buhatan sa CCPO samtang gikatakdang pasakaan kini og kaso karong adlawa o ba kaha karong adlaw'ng Lunes.