'Overkill' sa polis susihon sa CCPO

Anggulong “overkill” sa pagpusil-patay sa usa ka polis sa laing polis susihon sa Cebu City Police Office batok sa ilang sakop apan mipadayag nga suportahan nila ang kasong ipasaka batok sa nakapatay'ng polis.

Si Supt. Pablo Labra, ang deputy chief for administration sa CCPO mitug-an sa mga tigbalita nga ilang susihon kung dunay lapso nga nahimo si PO1 Mark Anthony Manlosa “pagdepensa” sa iyang kaugalingon nga miresulta sa kamatayon ni PO1 Calvin Dinampo.

Si Dinampo naigo diha sa ulo, sa hawak ug bukton ug sa paa nga nakaingon sa hinanali niining kamatayon, nakuha diha sa crime scene ang usa ka 9mm pistol, usa ka basiyo sa kalibre 9mm nga bala, ug siyam ka basiyo sa .45 kalibre nga bala.

“Akong suportahan ang charges nga gi-file batok sa kauban natong police kay sa imbestigasyon nigawas lagi nga it was a legitimate operation kay dunay alarma nga dunay tawong nagdala og armas. Apan kinahanglan nga duna gyuy imbestigasyon, tungod duna tay nabantayan nga possible lapses, kay una,  is it necessary for him to fire those bullet to neutralize Dinampo, that’s why mao na ang atong gi-file nga kaso. And it’s up to the fiscal to upgrade the charges,” asoy pang Labra ug midugang nga dunay administrative investigation nga himuon batok kang Manlosa.

Si Manlosa sakop sa Tourist Cop unit sa CCPO samtang si Dinampo sakop sa Talisay City Police Station kinsa giingong wala magka-ilhanay dihang nahitabo ang panag-engkwentro niadtong adlaw'ng Pasko.

Si Dinampo gikatahong mipasalipod kang Allan Añana, vendor og pabuto ug misuway pagpusil kang Manlosa apan giingong wala mobuto ang armas ug nakahimo usab pag-ikyas ang vendor hinungdan nga nakahigayon og pusil si Manlosa kang Dinampo,  base sa imbestigasyon.

Matud pang Labra ang pagpasalipod sa usa ka tawo sa usa ka suspek maisip nga pagpang-hostage.

Sa report sa Homicide Section, dunay mga testigos nga niingong hubog si Dinampo ug nanion pa kini sa iyang armas ngadto sa mga nangaroling nga mga bata.

Naagian kini ni Manlosa ug gipangutana kung polis ba kini apan wala kini motubag ug diha-diha gibitad niini si Añana ug nisunod na ang pagpusil.

Si Insp. Mario Monilar, hepe sa Homicide Section mitug-an sa mga tigbalita base lang sa nakuhang ebidensya ug pamahayag sa mga testigos kasong reckless imprudence resulting to homicide ra gyud ang ilang mapasaka batok kang Manlosa.

Dunay mga polis nga kaubanan ni Dinampo nga di buot magpahingalan ang mikwestyon nganong dili nalang homicide ang gisang-at batok kang Manlosa, ug midugang nga daw “overkill” ang nahitabo tungod sa kadaghan sa balang gigamit ni Manlosa.

Si Labra nagkanayon nga ilang dawaton kung dunay himuong parallel investigation ang Cebu Provincial Police Office kabahin sa insidente apan kini miklaro nga nahitabo kini sa ilang hurisdiksyon.

Ang uyoan ug igsuon ni Dinampo nga sila si SPO4 Pacifico Maeslim ug PO3 Reolito Dinampo miadto na sa buhatan sa Homicide Section kagahapon ug mipadayag nga dunay posibilidad nga modangop sila sa laing investigation unit kabahin sa kaso.

Apan ang duha midumili paghatag og pamahayag sa mga sakop sa media dihang buot silang kuhaan sa ilang habig gawas lang sa pag-ingon nga naa pa sila sa pagbangutan.

Gi-upgrade kagahapon sa piskalya ngadto sa homicide ang kaso ug laing reckless imprudence resulting to physical injuries tungod sa pagkaangol sa kapin usa ka tuig nga batang babaye ang gisang-at batok kang Manlosa.