CCPO andam mobantay kun CPDRC inmates ug Akrho moapil

Andam motagana og seguridad ang Cebu City Police Office sa higayon nga tugutang makaapil sa mga kadagkuan sa Sinulog Foundation ang mga piniriso sa Cebu Provincial Detention and Rehabilitation Center (CPDRC)  ug ang Alpha Kappa Rho Fraternity atol sa Sinulog Marde Gras karung Enero sunod tuig.

Kini maoy gipadayag ni Supt. Paul Labra II, Deputy Director for Operation sa Cebu City Police Office ngadto sa mga tigbalita kagahapon.

Matud pang Labra nga dunay daghang mga polis ang ibutang aron mabantayan ang mga piniriso nga walay makaiskapo atol sa Sinulog.

Hinuon matud ni Labra nga dili bug-at alang kanila apan kinahanglan doblihon ang ilang effort sa pagbantay sa mga piniriso nga moapil sa presentasyon sa maong kalihokan.

Wala gisalikway ni Labra ang posibilidad nga dunay mga pinirisong apil og sayaw nga nagplanong moeskapo.

Matud pang Labra nga mag-agad lang sila sa mga tagdumala sa Sinulog kung tugutang mapaapil ang mga piniriso sa Sinulog. Mangayo gilayon sila ngadto sa Regional Headquarters og dugang augmentation force gikan sa Regional Mobile Group (RMG) aron madugangan ang mga polis sa Cebu City Police Office.

“Wala tay mahimo ana kung unsay plano sa tagdumala sa Sinulog, ang ato lang mo-provide ta og security,” dugang pang Labra.

Samtang dugang bantayan sa kapolisan sa CCPO ang mga sakop sa Alpha Kappa Rho nga moapil sa Sinulog.

Hinuon sa pagka karun wala pay report nga paapilon ang miyembro sa Akrho atol sa Sinulog.

Apan si Labra nagkanayon, sa milabay’ng tuig nahimong malinawon nga walay mga panghitabo nga gikatahong nagka engkuwentro ang Akrho ug Tau Gamma Phi atol sa maong kalihokan.