Bercede vs. Ouano sa ABC – Mandaue

Si Banilad barangay Kapitan Glenn Bercede maoy bugtong  ikaatbang ni incumbent  Association Barangay Council Federation President Joveta Tuela Joy Ouano sa iyang pagpasubli sa maong katungdanan.

Gikatakda kining pagahimoon karong Sabado sa Cebu International Convention Center sa reclamation area nga tambungan  sa mga  kapitan sa 27  ka barangay sa dakbayan sa Mandaue.

Nahimong one- on- one ang ilang panag-atbang ni Glenn ug Joy human si Subangdaku Barangay Kapitan Walter Dy wala  mopadayon sa iyang tinguha nga mokandidato alang sa maong katungdanan.

Si  Dy nga gihinabi sa Banat News miingon nga nakahukom siya sa dili na lamang pagpadayon sa iyang kandidatura sanglit nasuta man usab niya ang iyang kapildehan batok sa duha ka mga lig-on niyang kaatbang.

Si Kapitan Joy sa Opao nga maoy incumbent ABC Federation president ug anaa na sa iyang katapusang termino ang  magpasubli sa iyang katungdanan sa ikatulong termino isip ABC federation president .

 Walay kontra si Barangay Kapitan Elstone Dabon sa Maguikay alang sa pagka ABC federation vice president sanglit walay laing kandidato nga nagpapili sa maog katungdanan.

Mao usab ang alang sa board of trustee sa ABC sanglit  ang walo nga maoy gikinahanglang sakop mao lamang  usab ang nakaduso sa ilang kandidatora.

Naglakip sa walo ka board of trustee mao sila si Hermelino Delmar Jr., barangay kapitan sa Ibabao, Estancia, Oscar Mendoza sa barangay Paknaan, Andres Suson sa Pagsabungan, Vicente Dayanan sa Basak, Vidal Cabatingan sa Casili, Benjamin Basiga sa Casuntingan, Edgar Bihag sa Cubacub, Mario Basiga sa Tingob ug Coregedor Cosedo sa barangay Cabancalan.