Dunay sugyot karon si Cebu City Acting Mayor Michael Rama ngadto sa kapulisan aron malikayan na nga magkaunay og pinusilay ang mga polis.
Kini human sa hitabo niadtong Lunes sa gabii nga nagkapinusilay ang pulis sa dakbayan sa Sugbu ug ang sakop sa Talisay Police Station.
Walay suwerte si PO1 Calvin Dinampo tungod kay kini nakabsan sa kinabuhi human makaangkon og ubay-ubay nga mga samad sa iyang kalawasan.
Samtang si PO1 Mark Anthony Manlosa sa Cebu City Police Office nga maoy nakapusil-patay kang PO1 Dinampo gipasakaan na usab og tukmang kaso.
Matud ni Rama nga kinahanglang dunay isul-ob ang mga polis sama sa kwintas nga timailhan sa ilang pagkatinugyanan sa balaod kun kini maka-sibilyan.
Apan gitataw sa acting mayor nga mas maayong ang chapa mismo sa polis ang dalhon kanunay niini aron maoy ipakita kung dunay masugatan nga alarma.
“Dili man mahimo nga muingon ka lang nga pulis ko, mahimo man nang litukon sa ubang mga tawo, asa man ang imong chapa?”sumala ni Rama.
Gihimong sanglitanan sa acting mayor ang kapulisan didto sa Amerika nga dili ibuwag niini ang ilang mga chapa sa higayon nga sila molakaw.
“Sa America ang mga polis didto kanunay gyud nga magdala sa ilang mga chapa and the police here should be doing that,”dugang pamahayag ni Rama.
Sa pikas bahin ang acting mayor padayong nangindahay nga mahinayon na ang iyang gipangandoy nga programa alang sa kapolisan sa dakbayan.
Gusto si Rama nga mapaubos sa kompleto nga comprehensive training ang kapulisan sa dakbayan ug dili lang sa firearms proficiency.
Naobserbahan sa acting mayor nga daghan karon sa mga polis sa siyudad ang dagko na og mga tiyan ug ang uban giingong mga masakiton.
Gani niingon si Rama nga dunay mga polis sa siyudad nga dili maantigong musul-ob ug mudala sa ilang mga uniporme nga angayang respituhan sa publiko.
Nagpabilin lang hinoong damgo ang sugyot sa acting mayor alang sa mga polis tungod kay giingong dunay dili pabor sa iyang plano.
Nagdumili hinoon pagbutyag ang acting mayor kung kinsa ang supak sa iyang sugyot nga gastuhan sa syudad ang comprehensive training sa mga polis.