Nabulit og dunggab

Usa ka lalaki ang napalgang patay nga puno sa samad dinunggaban sa nagkadaiyang parte sa lawas daplin sa sapa sa barangay Polo, lungsod sa Alcantara.

Ang biktima giila nga si Edgar Dumagpi, biyudo, walay trabaho ug lumad nga taga barangay Candabong sa maong lungsod.

Usa ka Nestor Linato nga nagpuyo ra usab sa maong dapit maoy nipahibalo sa kapolisan kabahin sa patay’ng lawas sa biktima.

Base sa inisyal nga imbestigasyon sa mga kapolisan sa Alcantara pinangulohan ni SPO3 Abec Cultura ug ni Municipal Health Officer (MHO) Dr. Cesar Mahinay ang biktima nakaangkon og daghang samad dinunggaban sa nagkadaiyang parte sa lawas ug nahabwa pa ang tinai niini hinungdan sa hinanali niining kamatayon.

Base usab sa medico legal nga gipadangat ni Mahinay ngadto sa kapolisan ang biktima posibleng gidunggab pasado alas otso sa buntag atol sa Pasko.

Padayon pang giimbestigahan sa mga kapolisan ang motibo sa pagpatay sa biktima ingon man ang responsable sa pagkamatay niini.