... nakapusil gidayeg ni Mike

Gipasigarbo ni  acting Mayor Michael Rama si PO1 Mark Anthony Manlosa sa kaandam niini kanunay pag-atubang sa risgo.

Kini dihang si Manlosa nga sakop sa Cebu City Police Office nakigpinusilay sa laing polis nga si PO1 Calvin Dinampo niadtong Lunes sa gabii.

Si Dinampo nga sakop sa Talisay City Police station nakaangkon og ubay-ubay’ng mga samad sa iyang kalawasan nga maoy nakaingon sa iyang kamatayon.

Nahitabo ang engkwentro sa duha ka polis dihang si Dinampo giingong nang-hostage og firecracker vendor diha sa barangay Tisa ning siyudad.

Matud ni Rama nga dako og natabang kang Manlosa ang gipasiugdahan sa dakbayan nga proficiency training ngadto sa kapulisan.

Alang sa acting mayor igo lang nitubag si Manlosa sa iyang katungdanan ug sa angayan niining buhaton.

“The most important thing that we were able to make a statement that nobody can mess up or just take things for granted when it comes to peace and order in the city,” matud ni Rama.

Sa pikas bahin, walay nakitang sayop ang acting mayor sa pagtubag og alarma sa mga sakop sa SWAT team sa siyudad.

Alang kang Rama lihitimo ang gihimo nila ni PO3 Reynaldo Callet ug SPO2 Reynante Nioda.

Ang duha ka polis mipusil-patay sa usa ka Alejandro Bayarcal atol sa gipahigayon niining hot pursuit operation diha sa barangay Inayawan.

Si Bayarcal gigukod sa mga sakop sa SWAT team human kini giingong nakapatay, apan inay motahan sa kapolisan kini gikatahong  misukol na hinuon.

Sila si PO3 Callet ug SPO2 Nioda nahiagom og mga samad pinusilan sa ilang mga kamot ug tiyan hinungdan nga gibawsan pagpusil ang suspetsado.

Alang kang Rama husto ang gihimo sa duha ka polis tungod kay giingong determinado ang suspetsado sa pagpusil kanila.