Mokabat sa 32 ka pamilya ang nawad-an sa ilang pa- nimalay niining panahon sa pagsaulog sa Pasko ug Bag-ong Tuig human gipatuman ang demolisyon sa sitio Anakma, barangay Pagsabungan, dakbayan sa Mandaue.
Si Aboy Seno nga maoy sherif nga nagpatuman sa maong demolition order sa korte nga gikahinabi sa Banat News miingon nga ang demolisyon sumpay sa naputol nilang pagpatuman sa miaging mga bulan niining tuiga.
Si Thelma Perez nga maoy tag-iya sa maong luna nga gihinabi sa Banat News miingon nga napugos na lamang siya sa pagpatuman human sa pipila ka mga bulan nga gihatag nga lugway.
Dugang pa niya nga niadtong miaging mga bulan siya nag-awhag sa maong mga lumolupyo sa pagduol sa nakapalit nga Anakma Association aron adto na lamang sila magdatadata.
Gitataw niya nga gihimo nila ang pagpatuman sa maong demolisyon sanglit base sa ilang kontrata nga mahingpit usab ang pagbayad kanila kun mahingpit usab ang paghawan sa mga ilegal nga estraktura.