Usa ka kanhi polis nga nakontrobersyal kaniadto nadakpan sa mga sakop sa Criminal Investigation and Detection Group-7 tungod sa paghupot og armas nga walay mga lisensya.
Ang nadakpan mao si kanhi PO1 Junicar Estiñoso, kanhi sakop sa Regional Service Security Group sa Police Regional Office-7 ug ning bag-uhay lang nataktak sa serbisyo tungod sa kasong pagpangulata og babaye.
Ang grupo sa CIDG-7 pinanguluhan ni Chief Insp. Patrick Vaño, armado sa search warrant nga giluwatan ni RTC Branch 9 judge Geraldine Faith Econg tungod sa impormasyong nagtinil gihapon kini og armas bisan og wala na kini sa serbisyo.
Ang pagronda nahitabo diha sa panimalay ni Estiñoso sa sitio San Roque sa barangay Sambag Dos niadtong Miyerkules sa gabii ug gisaksihan sa mga barangay tanod sa maong barangay.
Matud pang Sr. Supt. Jose Jorge Corpuz, hepe sa CIDG-7 nga dunay mga sumbong nga ilang nadunggan kabahin sa giingong pagdala-dala pa gihapon niini og pusil diha sa ilang dapit hinungdan nga mikuha sila og search warrant batok kaniya.
Nakuha diha sa iyang balay ang usa ka .45 kalibre pistola nga may 16 ka buhing bala, usa ka .6 millimeter pistol, duha ka magazine sa kalibre .45, upat ka speed loader sa .38 revolver; 18 ka buhing bala sa kalibre .38; usa ka buhing bala sa armalite; 16 ka basiyo sa .45 kalibre; ug holster.
Dugang nakuha diha sa iyang balay ang mga drug paraphernalia, apan kini gihimakak sa maong polis nga iyaha.
Samtang kabahin sa armas, si Estiñoso miangkong iya kini gumikan kay para usab sa iyang proteksyon tungod kay daghan na siyang nadakpan kaniadto sa dihang wala pa siya mataktak sa serbisyo.
Hinuon mitug-an kini nga dunay impluwensyadong tawo nga mipersonal na og maayo kaniya ug buot gyud nga siya mataktak sa serbisyo.
Si Estiñoso nakontrobersya niadtong milabay’ng tuig gumikan sa pagkadasmag sa Toyota Innova patrol car sa Cebu City Police Office dihang nadestino pa kini sa maong buhatan.
Nasundan usab kini dihang gipasanginlan kini sa usa ka babaye nga siya gikulata sa maong polis, tungod sa maong kaso nataktak sa serbisyo si Estiñoso sugod niadtong Oktobre 24 apan ning Nobiyembre 26 lang niya nadawat ang maong order.
Duna nay apelasyon nga gisang-at si Estiñoso kabahin sa pagkataktak kaniya sa serbisyo diha sa buhatan sa PRO-7.
Si Police Regional Office-7 director Chief Supt. Ronald Roderos sa pakighinabi sa Banat News nagkanayon nga iya pang huwaton ang dokumento sa kaso ni Estiñoso kabahin niining bag-ong kasong iyang giatubang.