2 ka ex-NPA nakadawat P60 mil gikan ni Gwen

Gihatagan og P60 mil  nga hinabang pinansiyal alang sa livelihood program ang duha ka mga sakop sa  New People’s Army (NPA) nga taga lungsod sa Tuburan nga bag-ohay lang mitahan sa ilang kaugalingon sa gobiyerno.

Si Gobernador Gwendolyn Garcia mihatag og tag P30 mil   nga hinabang pinansiyal ngadto sa duha ka mga sakop sa NPA nga nakahukom nang magbag-o sa ilang kinabuhi atol sa gihimong pag-presentar niini kagahapon sa Kapitolyo.

Sila si Lt. Col. Jeferson Omandam tigpamaba sa Central Command (CENTCOM) ug Lt. Col. Oscar   Lasangue sa Community Relations Group  nga maoy mipresentar nila ni Raul Dakay ug Welson Quijano nga mga gitumbok nga lider sa NPA didto sa barangay Ca-ang lungsod sa Tuburan ngadto kang   Garcia, Bise  Gobernador Gregorio Sanchez ug sa mga board members kagahapon mihulagway nga timailhan lang kini nga nagkaluya na ang rebelding NPA dinhi sa Central Visayas.

Matud ni Omandam naluya ang sempatiya sa maong duha ka rebelde ngadto sa ilang pundok human wala tumana ang mga gipasalig niini sama sa pag-angkon og luna ingon man ang tag P1,200  nga gipasalig niining allowance  matag bulan.

Matud ni Omandam nga naghinayhinay na og biya ang mga sakop sa walhong pundok tungod kay nahigmata na kini nga gigamit ug giilad lang sila aron morebelde batok sa gobiyerno.