Biyuda, 91, gitulis ug gipatay

Usa ka 91-anyos nga biyuda nga napalgang patay sulod sa iyang balay human kini gikatahong gitulis ug pagkahuman gipatay pinaagi sa pagtigbas sa makadaghang higayon sa iya ra usab nga apo kagahapon sa Barangay Li-ong, Dumanjug.

Ang mga silingan nakadungog sa singgit ug inagulo sa biktima nga si Agustina Pilar, 91, pagka-alas 2 sa kaadlawon, apan  buntag na kining napalgan sa iyang apo.

Si Joel Belocura, 27, ulitawo, nga maoy gitumbok nga mitulis ug mipatay ni Pilar nadakpan nianang pagka-alas 9 na sa buntag sa grupo nila ni PO3 Saul Alejandria, PO2 Dan Villardan ug mga kaubanan sa Dumanjug Police Station.

Si Insp. Ricardo Nayne, hepe sa kapolisan sa Dumanjug, nagtuo nga gilugos pa ang 91-anyos nga biyuda sa wala pa kini patya ni Belocura, apan misaad nga imbestigahon pa kini sa iyang mga sakop.

Si Belocura nasuta nga anak sa pag-umangkong babaye ni Pilar. Giingon nga usa kini ka rugby boy.

Sumala pa ni Insp. Nayne nga hubo na ang underwear ni Pilar sa dihang napalgan kini sa iyang apo nga lalaki samtang naglunang sa kaugalingon niining dugo ug hilabihang kadaghan sa samad tinigbasan.

Nakit-an sa kapolisan ang samad ni Pilar sa bukton ug bulog ug ang labing dako nga samad diha sa nawong nga napikas gyud nga maoy gituohan nga maoy hinungdan sa kamatayon niini.

Ang kapolisan nagkanayon nga si Pilar nag-inusara na lamang sa iyang balay ug pagahatdan na lang kini og pagkaon sa iyang apo nga si Carlito.

Si Insp. Nayne miingon nga nakit-an sa mga silingan si Belocura nga nagkadugo ang t-shirt ug short pants sayo sa buntag kagahapon.

Kini maoy hinungdan nga daling nakapahibalo sa kapolisan ang tagtungod sa biktima.

Sa dihang gisikop, si Belocura nakuhaan og sundang nga maoy gituohang gigamit pagpatay kang Pilar ug ang Seiko nga relo nga giingong iya sa namatay’ng biyuda.

Mihimakak si Belocura sa pasangil. Apan sa dihang gitunol niini ang relo aron ipa-prenda, nakaila dayon ang apo nga lalaki nga iya kini sa iyang lola.

Tungod sa relo, nakaangkon si Belocura nga maoy mipatay sa biktima.

Si Insp. Nayne nagkanayon nga iyang ipa-autopsy ang lawas ni Pilar aron matino kun gilugos ba kini ni Belocura. Samtang si Belocura nga giingong tighingosan og rugby dad-on dinhi sa dakbayan aron ipa-drugtest.