Bombshell, pulbora dayag gipamaligya sa Babag

Ubay-ubay nga gidak-on sa bombshell ug pulbora  nakita sa akto sa Firearms and Explosives Security Agency, Guards Supervisory Section (FESAGS) ug kapolisan sa dakbayan sa Lapulapu nga gipamaligya sa mga estante sa firecracker zone sa Barangay Babag dakbayan sa Lapulapu.

Kini ang giluwatang pamahayag ni Lapulapu City Police Office Director  Supt. Louie Oppus sa pakighinabi sa Banat News.

Matud pa ni Supt. Oppus sa ilang padayon nga pag-monitor sa mga namaligya og pabuto diin ilang gisusi kun aduna bay mga lisensiya ang mga gigikanan sa mga gipamaligyang pabuto usa niini ang nasuta nga namaligya og mga dagkong klase sa pabuto nga walay lisensiya.

Matud pa ni Oppus ilang nakita ang ubay-ubay nga mga pabuto nga mga dagko na kaayo og porma sama sa bombshell sa mortar diin gidili kini nga ipamaligya.

Bugtong   mga military ug police   makagamit sa mga pabuto nga susama sa ilang gamiton sa ilang mga exercises apan wala kini itugot nga ipamaligya.

Nasuta usab nga aduna pay uban nga wala pa mahuman sa paghimo niini hinungdan nga ila kining gikonpiskar.

Gumikan niini mipahimangno si Oppus nga ila gyud nga sikopon ang mga tawo nga namaligya ug naghimo og pabuto nga dili lisensiyado ug dili lakip sa tulo ka mga tao nga gihatagan og katungod sa paghimo  og pabuto.

Ang tulo ka mga accredited manufacturer mao lamang sila si Nestor Ymbong, Mario Avilo ug Julian Pongasi.