16-anyos mikulata sa 6-anyos gisikop sa SWAT

Usa ka 16-anyos nga lalaki  nadakpan sa joint operation sa kapolisan sa Police Station 1 sa Mandaue City Police Office  ug mga sakop sa Special Weapon and Tactic (SWAT) kinsa gikataho nga midagit ug mikulata  sa  6 anyos nga batang babaye sa  sitio Ihawan, barangay Mantuyong, dakbayan sa Mandaue.

Si PO2 Rosendo Cabrera miingon nga ang inahan sa biktima maoy nahidangat sa ilang buhatan sa miaging hapon alang sa pagtaho sa pagkawagtang sa anak niini.

Subay sa pamahayag sa mga silingan nga nakakita sa bata nga gidala sa suspetsado sa wala pa usab mahibaw-ing lugar sa barangay Mantuyong nga maoy nakaaghat kanila sa pagsuhid sa pipila ka dapit niini.

Si PO2 Rosendo midugang nga sa pagsiksik sa kapolisan maoy naabtan ang biktima sa bakanteng payag sa maong dapit nga nakabaton og mga bun-og sa iyang kalawasan.

Sa nasayran nga ang suspetsado kinsa giisip nga special child sa iyang mga ginikanan   gisugo sa pagpalit sa tindahan ug nalabyan ang biktima nga nagdula ug gidala sa hilit nga lugar ug gikulata.

Gisuhid sa kapolisan ang pipila ka hilit nga dapit duol sa nahimutangan sa biktima ug ilang napalgan ang suspetsado ug nadakpan.

Si PO2 Cabrera miingon nga ilang pasakaan og kaso ang suspetsado ngadto sa korte human usab nila makuha ang resulta sa medical examination sa mga doktor sa Vicente Sotto Memorial Medical Center sa dakbayan sa Sugbu.