Helper 'palgang may pinusilan

Usa ka helper og fish vendor sa Pasil Fishport ang napalgang patay ug may mga samad pinusilan kagahapon sa kaadlawon diha sa dalan Don Sulpicio Go sa Reclamation Area ning dakbayan.

Ang biktima giilang si Adonis Altor, 43, residente sa maong dapit kinsa gikatahong padulong na unta ngadto sa trabahoan dihang nakadungog nalang ang mga silingan niini og sunod-sunod nga buto sa armas.

Dihang ilang gisusi ang dapit, napalgan nalang ang biktima nga wala nay kinabuhi ug may mga samad pinusilan sa kalawasan ug sa tuong bahin sa aping.

Sa pagsusi nila ni SPO1 Jay Yballe sa Homicide Section nasutang may tattoing sa aping sa biktima nga gidudahang gikan sa pagbuto sa wala matinong kalibre sa armas nga gidul-it kaniya.

Ang biktima naigo usab kaduha diha sa walang bahin sa iyang lawas nga nakaingon sa hinanali niining kamatayon.

Sumala pa sa kapuyo sa biktima nga giilang si Rosalina Sapra mao pay pagkanaog sa biktima sa ilang balay aron moadto sa Pasil Fishport niadtong tungura.Walay nakitang basiyo o ba kaha slugs diha sa crime scene ang kapolisan samtang gisusi na kung kinsa ang posibleng nakaaway niini.

Apan duha ka mga gwardiya nga nagbantay dili layo sa gihitaboan ang giimbitar sa kapolisan aron mapangayoan og pamahayag kabahin sa insidente.