Bulletproof vest ug kevlar helmets adto lang sa MPG

Gibutyag ni Bise Mayor Mike Rama, ang tsirman sa Police Coordinating and Advisory Council (PCAC) nga ang ilang   tinguhang  mapalitan og mga bulletproof vest ingon man helmet  ang mga piniling unit sa Cebu City Police Office.

Kini maoy giklaro sa Bise Mayor dihang gikuhaan og reaksyon sa Banat News, human usab si Mayor Tomas Osmeña, mipadayag nga dili siya mopalit sa maong mga kahimanan gumikan kay tagsa lang gamiton sa kapulisan.

Matud pa  ni Rama nga ang ilang nahuna-hunaang  sugyot mao    nga kadto lang mga polis nga nadestino sa mobile patrol group o motubag og alarma maoy palitan niini.

Alang kang Rama gikinahanglan gyud nga adunay protekta sa kalawasan  ang mga police nga motubag og alarma   aron masiguro usab ang mga kinabuhi niini batok sa mga kriminal.

Sa nasayran nga ang maong lakang gitinguha sa PCAC human usab sa kamatayon ni PO1 Noriel Luage, kinsa napatay niadtong milabay'ng semana human   misukol si Ramon Jaime Baclohan, kinsa maoy gipasanginlang "broker"  ni Arestotle Aves nga gipasanginlang  hitman og gun-for-hire.