Naalaang tulisan, gikulata

Pasaherong midunggab   sa drayber sa giluwanan niining taxi ang nakabaton og grabeng bun-og   human  kini tabangi'g kulata sa mga estambay kinsa nagtuo nga usa siya ka tulisan.

Ang grabeng nabun-og  mao  si Ceferiano Canoy, 55,  nga construction worker nga taga Ceniza Compound sa barangay Maguikay, dakbayan sa Mandaue.

Ang nadunggabang drayber giilang si Jaynan Bacornay, 28, minyo nga taga Pagsabungan sa maong dakbayan kinsa nasamdan sa bukton.

Si PO2 Dante Wenceslao sa Presinto 5 nga gikahinabi sa Banat News miingon nga gikan sa dakbayan sa Lapulapu ug hubog si Canoy sa gimanehong taxi ni Bacornay.

Paghidangat sa eskina sa UN Avenue ug eskina J. Plaridel sa barangay Umapad sa dakbayan sa Mandaue nakahukom si Bacornay nga dili nalang modagan og biyahe ug gipakanaog si Canoy.

Nanaug si Canoy sa taxi apan nagdumili usab pagbayad sa iyang pletihan nga mitatak sa metro nga maoy hinungdan nga nahitabo ang panaglalis.

Taliwala sa  mainiton nga panaglalis si  Canoy   dali nga mihulbot sa talinis nga bilya niining bakus ug nadunggaban niini ang tuong bukton ni Bacornay.

Si Bacornay nga nakabaton na og samad sa iyang bukton   nangayog panabang sa mga estambay kinsa nagtuo  usab nga gitulis  daling mihamag ug gitabangan  og  kaluta si  Canoy hinungdan  sa mga bun-og niini.