Mangayo og panabang sa kapolisan si Kapitan Eugenio “Jingjing” Faelnar sa Guadalupe tungod sa taho nga anaa sa ilang barangay ang gikaintapan nga si alias Waway. Sumala pa ni Faelnar nga nahinabi sa Banat News nga mangayo siya og hulagway ni Warlito Toledo alias Waway nga lumad nga taga dakbayan sa Danao aron ipakatap sa iyang barangay.
Si Faelnar nagkanayon nga nagkagubot ang mga lumolupyo sa Sitio Kawayan, Banawa tungod kay ilang nasigpatan si Waway sa maong lugar niadtong nag-inangat ang kapistahan sa maong lugar.
Tungod niini, gituyo og duaw ni Faelnar ang maong lugar niadtong besperas sa ilang pista aron sutaon ang kahadlok sa mga tawo.
Ang mga residente sa maong sitio miasoy kaniya nga aduna silay nasigpatan, apan iyang gihangyo nga magpabilin lang nga magmabinantayon kay wala silay saktong kasayuran kalabot sa tinuod nga pagkatawo ug dagway ni Waway.
Giangkon hinuon sa pipila ka residente sa iyang barangay nga nabalaka sila nga biktimahon ni Waway tungod kay wala sila makaila sa dagway niini. Nabalaka sila nga anaa ra manimuyo sa ilang duol si Waway.
Gimandoan hinuon ni Faelnar ang iyang mga barangay tanod sa pag-igmat sa pagbantay sa barangay aron malayo sa mga panghitabo ang mga lumolupyo, bisan naglambigit man ni Waway o ubang krimen.
Ang tawo nga modagsa sa Guadalupe suhiron sa mga tanod, sumala pa sa kapitan.
Giawhag usab ni Faelnar ang kababayen-an ug kabataan sa Guadalupe sa pagbantay sa ilang kaugalingon aron paglikay sa gikabalak-an nilang pagpanghilabot ni Waway.
Samtang ang Guadalupe Police Station walay nadawat nga report kalabot sa presensiya ni Waway sa ilang hurisdiksiyon.
Si PO1 Clee Bumaat, desk officer sa police station nagkanayon nga walay na-blotter nga susama nga insidente sa Lilo-an ug Danao nga naglambigit kang Waway.
Sumala pa ni PO1 Bumaat nga walay kamatuoran ang tabi-tabi nga mikatap sa Guadalupe.
Matud niya nga nagpabiling malinawon ang ilang hurisdiksiyon.
“Wa may report diri nga naabot ug gani sa intelligence officer namo wala man sab maghisgot niini og negative man seguro tabi-tabi lang gyud na apan dili tinuod,” si PO1 Bumaat miingon.
Apan mipasalig si PO1 Bumaat nga iyang ipaabot ngadto sa iyang mga opisyal ang nadawat niyang taho.
Kahinumduman, nabaniog si Waway sa Lilo-an ug Danao nga giingong manuktok sa kabalayan aron manglugos ug mopatay.
Ang iyang ngalan gikahadlokan usab sa dakbayan sa Lapulapu.
Apan si Sr. Supt. Carmelo Valmoria, direktor sa Cebu Provincial Police Office (CPPO) mipahibalo na nga si Waway usa lamang ka ordinaryong tawo nga dili angayang kahadlokan.
Si Valmoria nagkanayon may mga kasong giatubang si Waway, apan walay naabot nga report sa iyang buhatan nga manaka og kabalayan si Waway aron manglugos ug mopatay.