Natagodtagod ang kalawasan ug naputlan sa iyang kamot ang usa ka ginang sa panimalay human kini gitigbas patay sa iyang bayaw nga lalaki alas 6 pasado ang takna sa miaging Biyernes sa gabii sa sitio Cogon, barangay Maslog, dakbayan sa Danao.
Si SPO3 Quirino Vasquez sa pakighinabi sa Banat News miila sa biktima nga mao si Myrna Ramos, 52, residente sa maong dapit ug ang suspetsado giilang si Antonio Avila, 38, minyo, silingan ra niini diha sa maong dapit.
Sumala pang Vasquez, ang duha nagkabikil gumikan sa pag-umangkon sa suspek nga hinablos sa biktima.
Sa report sa usa ka sibyaanan kagahapon, gikatahong nagkaaway ang mga anak sa duha ug ang nahitabo naglinabanay hangtud nga misangpot sa panagbikil sa managbayaw.
Matud pa ni Vasquez padulong na pauli ang biktima dihang kini gisundan sa suspek ug sa walay daghang panabi kalit nga gitigbas ang biktima makadaghang higayon.
Gikatahong misuway pa og sagang ang biktima ginamit ang iyang mga kamot apan hasta kini naputol sa pinote nga gidala sa suspek hangtud nga gitagud siya og tigbas diha sa agtang, sa tiyan ug sa ubang parte sa iyang lawas.
Matud pang Vasquez patay diha-diha si Ramos ug wala na madala sa tambalanan samtang si Avila mitahan ngadto nila ni SPO2 Rico Oliverio ug SPO1 Allan Muñoz sa Danao City police station nga miresponde sa maong dapit.
Gitahan usab ni Avila ang pinote nga giingong iyang gigamit sa pagpatay sa iyang bilas ngadto sa mga polis.(Uban sa report ni Romeo Limpangog)