PNPA-Alumni, CIIB nang-apod og pinaskuhan sa brgy. Tejero

Gibana-banang kapin sa 500 ka mga nagpunsisok nga mga tawo ang nakadawat og pinaskuhan ug gatusan usab ka mga bata ang napakaon sa mga miyembro sa Philippine National Police Academy Alumni Association-Cebu sa barangay Tejero ug mga sakop sa Criminal Investigation and Intelligence Branch kagahapon sa buntag.

Ang PNPA-Cebu pinanguluhan ni Supt. Pablo Labra uban nila ni Sr.Supt. Patrocinio Comendador ug mga opisyal sa kapolisan nga gradwado sa PNPA ang mitambong sa maong kalihukan.

Mga bugas, de lata, noodles, ug uban pang makaon nga gisulod sa plastic ang gipang-apod-apod ngadto sa mga residente sa Tejero diha sa Tejero Sports Complex inabagan sa mga opisyales sa maong barangay pinanguluhan ni barangay Kapitan Jessielou Cadungog ug Konsehal Gary Lao.

Gawas sa maong mga plastic bags sa pagkaon, gilingaw usab sa mga opisyal ang mga bata ug mga ginikanan pinaagi sa ginagmay’ng mga contest ug ang premyo nga candy alang sa ilang mga anak.

Dugang pinaskuhan ngadto sa mga residente gipakaon usab sa kapolisan ang mga bata og sustansyadong lugaw nga gibalik-balikan usab sa kabataan.

Matud pang Labra maong gipili nila ang maong barangay nga maoy maapuran sa maong gasa kini aron mapaduol diha sa mga residente ang kapolisan tungod usab sa problema sa mga ilegal nga drugas.

Samtang si Comendador sa iyang bahin namahayag usab ngadto sa mga residente nga ang mga polis susama gihapon kang Santa Claus nga dili dalo ug andam motagana og panahon ug mosakripisyo sa iyang kinabuhi ngadto sa katawhan kung gikinahanglan.

Gihimong sanglitanan ni Comendador ang nahitabo kang PO1 Noriel Luage nga hasta ang iyang kinabuhi iyang gihatag ngadto sa katawhan dihang nagtuman kini sa iyang trabaho.