Si Bise Mayor Mike Rama miawhag kang Kongresista Antonio Cuenco nga moduso og formal letter sa konseho sa dakbayan subay sa panawagan niini nga mapadali ang pagbuwag sa Banawa-Ingles sa Barangay Guadalupe.
Si Bise Mayor Rama nga gikahinabi sa Banat News, mipasabot nga angayang ipaagi sa formal letter sa Kongresista kini aron mahatagan gilayon nila og aksyon.
Si Rama mipasabot isip maoy presiding officer sa konseho sa dakbayan angayan lang nga pormal ang maong request labi na sa ingon niining isyu nga paghimog laing barangay.
Giklaro ni Rama, nga ang isyu sa paghimo’g laing barangay dili na kini nila bag-o pa gumikan kay sukad nga wala pa siya mamahimong opisyal sa dakbayan nag-exist na kining mga problema sa kabarangayan sa dakbayan.
Gani iyang giangkon nga nalangay gyud ang pagtuki nila sa pagbuwag sa Banawa-Ingles sa Barangay Guadalupe gumikan kay daghang mga nagkadaiyang sektor ug panahom ang nisupak niini.
Apan wala usab magpasabot nga ila na kining gikalimtan sa konseho kun dili nalangay lang sa pagproseso gumikan kay adunay susamang problema sa ubang barangay sama sa Lahug ug uban pa.
Gikalipay niini ang pagpakabana sa kongresista sa maong isyu kini aron usab mahatagan nilag igong pagtagad nga matubag usab ang sintimiyento sa mga lumolupyo sa maong lugar nga gustong maghimo’g laing barangay.