Pito ka tuig nga "wanted" nadakpan

Usa ka pinangita sa kapolisan ang nadakpan human kini giingong “nagmaoy” sulod sa diskohan diha sa barangay Tisa ning dakbayan hinungdan nga nabisto kining siya maoy dugay  nang pinangita tungod sa pagpatay sa usa ka traysikad driver niadtong tuig 2000.

Ang nadakpan giilang si Victor Laborte, kinsa giingong hubog kaayo niadtong tungura ug nanghasi sa mga tawo ug dihang nakit-an ni SPO2 Herbert Diola dali kining mitawag og backup.

Matud pa sa hepe sa Theft and Robbery Section nga si Sr.Insp. Michael Bastes sa pakighinabi sa Banat News nga kasamtangang nagpatrolya ang iyang mga sakop pinanguluhan ni PO3 Jeffrey Diola dihang nakadawat og tawag gikan sa igsuon niining polis kabahin sa presensya ni Laborte.

Si PO3 Diola mao gihapon ang nakadakop sa duha pa ka mga kaubanan ni Laborte sa pagpatay sa maong traysikad nga nailhan lang sa pangalan nga “Tonyo”  kinsa giingong gitabangan nila og dunggab.

Giila ang laing kaubanan ni Laborte nga  sila si Creseldo Nanoy ug Allan Abarquez pinasikad gihapon sa warrant of arrest nga giluwatan ni RTC judge Galicano Ariesgado.

Si Laborte sa pakighinabi sa Banat News miangkon sa salaod ug kini mirason nga hubog sila niadtong tungura ug ingon man ang biktima apan mihimakak nga ilang gituyoan ang biktima sanglit rambol ang nahitabo niadtong tungura.