Sakmiton sa kapolisan sa Mandaue City Police Office (MCPO) ang mga paboto nga ibaligya sa merkado publiko ug uban pang dapit kun walay ikapakitang dokumento nga legal ang pagpamaligya niining panahon sa pagsaulog sa Pasko ug Bag-ong Tuig.
SI SPO2 Rogelio Travero nga gikahinabi sa Banat News kagahapon miingon nga higpit karon nilang gipatuman ang mga lagda sa pagpamaligya og paboto alang sa paghatag og kaseguroan sa katawhan.
Si SPO2 Travera miingon nga sa kasamtangang merkado publiko sa maong dakbayan ilang namatikdan nga wala pay namaligya og paboto.
Apan ilang gipaabot nga sa mga adlaw nga magkaduol na ang kasaulogan sa Pasko ug Bag-ong Tuig mamatikdan usab ang pagdagsang sa mga mamaligya og nagkadaiyang matang sa paboto.
Dugang pa ni SP02 Travero nga sa kasamtangan si Sr. Supt. Rodel Calungsod maoy iyang gihimo ang pagdestino og kapolisan alang sa pagbantay kun gituman ba ang balaod nga nag-regulate sa paggamit og paboto.
Matud pa ni SPO2 Travero nga sa pagpatuman sa maong balaod sa nasud nga gitumong alang sa paghatag og kaseguroan sa katawhan sa aksidente.
Si SPO2 Travero sa iyang pamahayag miingon nga daghang mga lagda nga angay sagupon sa katawhan alang sa paglikay nga dili mabiktima sa paboto sa panahon sa Pasko ug Bag-ong Tuig.
Naglakip sa mga lagda mao ang dili pagpataka og labay sa gidagkotan nga paboto, segurohon nga dili basa ang kamot kun modagkot og paboto o mogamit na lang og torotot, lata o takob sa kaldero alang sa pagsaba-saba.
Dugang pahimangno ni SPO2 Travero mao ang dili pagpunit sa mga mikagar nga paboto ug kon nasamad human mabuthi sa paboto maoy labing unang himuon ang paghugas sa samad sa limpiyong tubig ug dad-on ang biktima sa labing duol nga tambalanan.