Di “pagawong” kang Rep. Garcia

Uwahi na ang tanan para kang Mayor Cesar Baricuatro sa lungsud sa Dumanjug nga magkauli pa sa maayong buot ni Kongresista Pablo Garcia labot sa ilang baruganan sa pagsuporta sa ilang mamahimong manok sa ABC Federation.

Si Mayor Baricuatro nga gikahinabi sa Banat News mipasabot nga duol na kaayo ang piniliay hinungdan layo na kaayo ang posibilidad nga mausab pa ang iyang baruganan   pagsuporta sa iyang anak nga si Kapitan Cristopher sa barangay Poblacion batok kang Kapitan Tony Garcia sa Barangay Bitoon.

Hinoon giklaro niini nga andam gihapon siyag tagana og panahon sa pagpakigsabot sa ilang partido nga One Cebu Party nga gipanguluhan ni Gobernador Gwendolyn Garcia, isip pagtahod sa gobernador.

Apan para kaniya kun ugaling negatibo ang resulta sa ilang tigom dili gihapon siya magpagawong niini ug mopadayon siya sa pagsuporta sa iyang anak alang sa pagka-ABC president.

Para  niya walay nausab sa ilang maayong relasyon ni Gobernador Garcia ug nahitabo lang nga ang amahan niini nga si Kongresista Pablo Garcia, mosuporta sa pag-umangkon nga maoy nakapatibulaag nila sa maong lungsod.